पतिपत्नीसंलापः-७
कच्चित्प्रिये स्मरसि नृत्यदभूतकान्तिः
पुत्रोत्सवेऽभ्युपगते सुतमात्ममूर्तिम् ।
अङ्के निवेश्य तव मानसराजहंसम्
बालानवाप्यवचनैस्समभाषथास्त्वम्॥३३ ॥
कच्चित् प्रिय स्मरसि तानि मनोहराणि
वर्षाण्यपत्ययुगलालनशिक्षणेषु
प्रत्यूहकण्टकशतैरवरुद्धमार्गे
तूर्णं क्षणार्धसमये इव यापितानि ॥ ३४ ॥
कच्चित् प्रिये स्मरसि तावकदुःखधाराम्
पुत्र्यां नवोढललनोचितदीप्तिमूर्त्याम् ।
भर्त्रा सह श्वशुरगेहमभि प्रयान्त्याम्
हर्षावगुण्ठनतिरोहितनैजरूपाम् ॥ ३५ ॥
- - - -
No comments:
Post a Comment