simple sanskrit: April 2015

Saturday, April 25, 2015

विज्ञानसंंस्कृतिः-१९

माक्स्-प्लान्कवर्यो निरदिशत् स्वमेधसा

ऊर्जाप्रसारणं खण्डशो भवतीति

मूलतत्त्वं येन भौतविज्ञानस्य

नूत्नमार्गोऽभवत् खण्डवादस्य वै

बीजवापनमभूत् स्मरन्तो तां कृतिम्

विज्ञानसंस्कृतेस्ताडयत जयडिंडिमम् ॥ २० ॥

- - - -

विज्ञानसंस्कृतिः-१८

कान्तीयवैद्युतक्षेत्रयोर्वीचयो

आकाशमाध्यमे ज्योतिषो वेगेन

विसरन्ति दीप्तिरपि तदभिन्नवीचिर्हि

इति महासिद्धान्तमावृणोत् निशितधीः

जेम्स् क्लर्क माक्स्वलो संस्मृत्य तं मुदा

तज्ज्ञानसंस्कृतेस्ताडयत जयडिंडिमम् ॥ १९ ॥

- - - -

विज्ञानसंस्कृतिः-१७

मेण्डलीफ्नामरसशास्त्रवित् पाणिनेः

वर्णमालाक्रमात्स्फुरितधीः व्यरचयत्

मूलवस्त्वणुभारमनुसृत्य समुचितम्

क्रमबद्धगुणगणाधृतफलकमद्भुतम्

येन नवमूलवस्त्वस्तित्वमवगतम्

तज्ज्ञानसंस्कृतेस्ताडयत जयडिंडिमम् ॥ १८ ॥

- - - -

विज्ञानसंस्कृतिः-१६

योहान्न मेन्डलः क्रैस्तधर्मार्चकः

सस्यरोपणविधौ यन्त्रितपरीक्षणान्

निर्वाह्य वंशानुगतगुणानां विधीन्

सम्यङ्न्यरूपयत् हन्त स्वजीविते

ख्यातिं न लब्धवान् तद्गुणान् संस्मृत्य

तज्ज्ञानसंस्कृतेस्ताडयत जयडिंडिमम् ॥ १७ ॥

- - - -