simple sanskrit: July 2015

Saturday, July 25, 2015

विज्ञानसंस्कृतिः-३२

चलदूरवाण्यैव कर्षका वणिजश्च

कर्मकाराः स्वकार्यार्थमविरतमहो

सर्वत्र लीलया संलापमग्ना हि

वैद्युतान्तर्जालतन्त्रेण जगदिदं

करतलामलकवत् ज्ञानगोचरमभूत्

तज्ज्ञानसंस्कृतेस्ताडयत जयडिंडिमम् ॥ ३३ ॥

- - - -

विज्ञानसंस्कृतिः-३१

स्वातन्त्र्यपूर्वभारतदेशसञ्जात-

विदितहरगोविन्दखोराननामान-

मद्भुतपरीक्षकं येन प्रदर्शितो

जीवसूत्रग्रथनमार्गः प्रयोगैश्च

स्मरन्तो नोबेलुपायनोपार्जकम्

तज्ज्ञानसंस्कृतेस्ताडयत जयडिंडिमम् ॥ ३२ ॥

- - - -

विज्ञानसंस्कृतिः -३०

व्योमशास्त्रज्ञेषु निष्णातमप्रतिम-

धीशालिनं चन्द्रशेखरं नक्षत्र-

-गणगात्रसीमानमधिकृत्य साधितः

चन्द्रमर्यादेति विख्यातवरविधिः

येन नोबेल्‍पदकजयिनं समादृत्य

तज्ज्ञानसंस्कृतेस्ताडयत जयडिंडिमम् ॥ ३१ ॥

- - - -

विज्ञानसंस्कृतिः-२९

गणकयन्त्राधारदूरवाक्केन्द्राणि

कृत्रिमग्रहवाह्यसंवहनकेन्द्राणि

काचतन्तुस्तोमवाहिनीजालं च

संज्ञाप्रचारणे सौदामनीरयं

प्राकल्पयन्कन्दुकीकृतधरण्यां हि

तज्ज्ञानसंस्कृतेस्ताडयत जयडिंडिमम् ॥ ३० ॥

----