Sanskrit blog: Thus spake Timmu, the dull-headed.

मूढतिम्मुरुवाच

प्रेक्ष्य किञ्चित्तमसि शुनकस्तु शङ्कया

कुत्रापि कोऽपि सुहृदस्तीति चिन्तयन् ।

उन्मुखो भषति खलु तद्वदेवेति किम्

भक्तिर्मनुष्यस्य मूढतिम्मो ॥ ४८४ ॥   

A rough rendering of the following verse from “mankutimmana kagga” of DVG

ಕತ್ತಲೆಯೊಳೇನನೋ ಕಂಡು ಬೆದರಿದ ನಾಯಿ

ಎತ್ತಲೋ ಸಖನೊರ್ವನಿಹನೆಂದು ನಂಬಿ |

ಕತ್ತೆತ್ತಿ ಮೋಳಿಡುತ ಬೊಗಳಿ ಹಾರಾಡುವುದು

ಭಕ್ತಿಯಂತೆಯೆ ನಮದು ಮಂಕುತಿಮ್ಮ || ೪೮೪ ||

- - - -

Sanskrit blog: Humour-67

हास्यसीकरः-६७

चिरकालानन्तरं द्वे वृद्धे सख्यौ अमिलताम् । परस्परकुशलानन्तरं एका अन्यामपृच्छत् ।
एका: “कच्चित् कुशली तव भर्ता?”
अन्या: “मम दौर्भाग्यात् सः दैवाधीनः अभवत् ।“
एका: “ सुभृशं खिन्नास्मि । किमभवत् ?”
अन्या:” एकस्मिन् दिवसे तं शाकाय वृन्ताकमानेतुं विपणिं प्रेषितवती । मध्येमार्गं सः हृदयाघातात् मृतः।“
एका: “पश्चात् त्वं किमकरोः ?”

अन्या: “ किं करवाणि? शाकाय गृहस्य शाकवाटिकायामारोपितं कूष्माण्डमेव अपचम् ।“

- - - -

Sanskrit blog: The bird and the bee.

विहगः मधुकरश्च

श्रमार्जितं त्वन्मधु मिष्टमन्ये

सुखेन मर्त्याः खलु चोरयन्ति ।

कथं न खिन्नोऽसि वदेति पक्षिणा

पृष्टः कदाचिन्मधुमक्षिका क्वचित् ।।

मुष्णन्तु मूढाः मम किं मनुष्या

करोमि भूयो मधु लीलयाहम् ।

यावन्न मुष्टं मम कर्मदाक्ष्यं

मुष्टं न किञ्चित् विहगेत्युवाच ।।

A rough rendering in Sanskrit of the following:

The Bird Asked the bee:
"You Work So Hard To Make The Honey And Humans Just Take It Away,
Doesn’t it Make You Feel Bad?"
"No," Said The Bee, "Because They Will Never
Take From Me The Art Of Making It."

- - - - 

Sanskrit blog: Humour-66

हास्यसीकरः-६६

द्वौ सिह्मौ मृगालये आस्ताम् । एकः मृगालये जातः अपरः वने जातः । एकदा तौ मृगालयात् पलायितौ । मृगालयपालास्तु वनं गतं वन्यसिह्मं कतिपयदिवसेष्वेव पुनरपि निर्बध्य मृगालयमानयन् । मृगालये जातं नागरसिह्मं नगरं गतमन्विष्य त्रिमासादूर्ध्वं मृगालयमानीतवन्तः । द्वौ सिह्मौ प्ररस्परमभाषेताम् ।

वन्यसिह्मः : भोः वयस्य! त्वमेतावत्कालं कुत्र गतः । वने परिभ्रमन्तं मां लीलया न्यगृह्णन् ।

नागरसिह्मः : किं वदामि? अहं नगरे कस्मिंश्चित्सर्वकारकार्यालये दिवसानि लेख्यपत्रवृन्देष्वन्तरितः लीलया अयापयम् ।

वन्यसिह्मः : उदरपोषणं तु कथमभवत्?

नागरसिह्मः : प्रत्यहं कार्यालयोद्योगिनमेकमखादम् । उद्योगिनः सह्स्रशः सन्ति खलु । एकः न्यूनः अभवत् यदि तत्र कोऽपि न जानाति ।

वन्यसिह्मः : कथमिदानीं बद्धः अभूः ?

नागरसिह्मः : मया प्रमादः आचरितः खलु । ह्यः काफ़ीपरिवेष्टारं बालमखादम् । सपद्येव तस्य अनुपस्थितिः सर्वैः लक्षिता । सर्वे तस्य मार्गणे प्रवृत्ताः अभवन् । तदा लेखपत्रवृन्देष्वन्तर्हितं मां दृष्ट्वा भयात् पलायितवन्तः । मृगालयपालाः आगत्य मां पञ्जरे बबन्धुः ।

- - - - 

Sanskrit blog: Abraham Lincoln-an anecdote

अब्रहां लिंकनः: एका आख्यायिका

अब्रहां लिंकनः अमेरिकादेशस्य अध्यक्षपदवीं स्वीकृत्य प्रथमभाषणं कुरुते स्म । भाषमाणे लिंकने कश्चन गर्वितः धनिकः सभ्यः उत्थाय उच्चैरघोषयत्, “ भोः! कच्चिदवगतं त्वया यत् तव पिता ममाभिजनस्य चर्मकारः आसीत्?” इति । सर्वे सभ्याः तदवधीरणां निशम्य उच्चैः हसितुमारभन्त । परं तु लिंकनः धृतिमान् तं सभ्यमवलोकयन् गंभीरस्वरेण तमवदत्, “ मान्य! मम पिता भवदभिजनस्य उपानहः भवद्गृहे एव करोति स्म इत्यहं जानामि। अत्र सभायां अन्येऽपि भवेयुः येषां गृहेषु मम पिता उपानहः करोति स्म च । सहर्षं वदामि यत् मम पितृकृता उपानहः सदा अनर्घा अदोषाश्च आसन् । मम पिता उपानहां विधाता आसीत् । तत्कृत प्रत्युपानहोः तस्यात्मा एव प्रतिष्ठितः । उपानत्कर्मणि अहमपि निष्णातः । यदि भवान् वाञ्छति भवतः नूत्ने उपानहौ करोमि“ इति । दिग्भ्रान्ताः सर्वे सभ्याः उच्चैः करताडनमकुर्वन्,  सः भग्नगर्वः सभ्यः लिंकनस्य क्षमां च अयाचत ।

- - - - 

Sanskrit blog: Humour-65

हास्यसीकरः-६५

विस्मयकरं किञ्चन ऐन्द्रजालिककर्म कृतवन्तं ऐन्द्रजालिकं इन्द्रजालवीक्षकः कश्चन सभायाम् संबोधयति, “भोः, कथम् इदं विस्मयकरं कर्म करोषि? मां एतत्कर्म शिक्षयसि किम्?” इति । ऐन्द्रजालिकः प्रतिवदति, “ अवश्यं शिक्षयामि, परं तु पश्चात् मया त्वं वध्यः भविष्यसि । अङ्गीकरोषि किम्?” इति । सभ्यः स्तोकं विचिन्त्य प्रतिवदति, “ बाढम्, मम भार्यां शिक्षय” इति ।

- - - -

Sanskrit blog: Thus spake Timmu, the dull-headed.

मूढतिम्मुरुवाच

इष्टका जानाति किं सौधकल्पनाम्

सा विगलिता तर्हि भित्तिछिद्रं स्यात् ।

इष्टकामात्रमसि सृष्टिसौधेऽस्मिन्

वक्रासि चेत् पतसि मूढतिम्मो ।। ५३२ ॥ 

(Translation of verse 532 of "Mankutimmana kagga" of Sri.DVG in Kannada)

ಕಟ್ಟಡದ ಪರಿಯನಿಟ್ಟಿಗೆಯೆಂತು ಕಂಡೀತು

ಗಟ್ಟಿ ನಿಲದದು ಬೀಳೆ ಗೋಡೆ ಬಿರಿಯುವುದು |

ಸೃಷ್ಟಿಕೋಟೆಯಲಿ ನೀನೊಂದಿಟಿಗೆ; ಸೊಟ್ಟಾಗೆ

ಪೆಟ್ಟು ತಿನ್ನುವೆ ಜೋಕೆ- ಮಂಕುತಿಮ್ಮ || ೫೩೨ ||

- - - - 

Sanskrit blog: Hunour-64

हास्यसीकरः-६४

वृद्धदम्पती अन्यदम्पत्योः गृहे भोजनं स्वीकृतवन्तौ । भोजनानन्तरं पत्नी महानसं गते, पती तु भोजनगृहे एव संलपन्तौ आस्ताम् ।

वृद्धः इतरमवदत्, “ह्यः आवां कांश्चन भोजनशालां गतौ यत्र भोजनं रसवत्तरमासीत् ।“

इतरः अपृच्छत्, “तद्भोजनालयस्य नाम किम्?”

वृद्धः चिरमचिन्तयत्, परंतु तन्नाम स्मृतिपथं नागच्छत् । तदा वृद्धः इतरमपृच्छत्, “भोः, तत्पुष्पस्य नाम किं यत् श्वेतवर्णं मनोहरगन्धि निदाघकाले भूरि प्रभवति च?“

इतरः अपृच्छत्, “मल्लिका इति नाम किम्?” इति ।

वृद्धः प्रत्यवदत्, “आम्, तदेव, उपकृतोऽस्मि” इति ।

वृद्धः तदा महानसदिशि पश्यन् उच्चैरवदत्, “मल्लिके, मल्लिके, तद्भोजनशालायाः नाम किम्, यत्र आवां ह्यः भोजनमकुर्व?” इति ।

- - - - 

Sanskrit blog: A wise saying

सुभाषितम्

प्रखररविमयूखैः फुल्लतां याति पुष्पम्

परिणमति विशुद्धं स्वर्णमग्नौ प्रतप्तम् ।

प्रभवति नवनीतं मन्थनात् तक्रपात्रे

प्रबलबुधविवादात् जायते विश्वतत्त्वम् ॥

- - - - 

Sanskrit blog: Humour-63

हास्यसीकरः-६३

कृपण एकः सततम् अर्जितधने स्तोकं धनं व्यययित्वा, किञ्चिद्धनं भार्यायै प्रदाय शेषं धनं एकस्यां पेटिकायां निक्षिपति स्म । अवसानकाले सन्निहिते भार्यामवदत्, “प्रिये, मम धनप्रियता तव ज्ञाता एव । मयि उपरते मम सधनां धनपेटिकां मया सह निवेश्य भूगतां कुरु ।“ भार्या अवदत्, “प्रिय, निस्संशयं तथैव करोमि, अलं चिन्तया” इति ।

कृपणः असूनत्यजत् । विधेया अपि तु स्वार्थपरा भार्या तस्य धनपेटिकात् धनमादाय बैंके (bank) स्वसंख्याने (account) न्यस्य तद्धनसमानमौल्यं चैकं (cheque) भर्तृनाम्नि  विलिख्य तत् धनपेटिकायां न्यक्षिपत् भर्तुः शवेन साकं भूगतमकरोच्च ।

- - - -