Sanskrit blog: Humour-104

हास्यसीकरः-१०४

भार्या : अहं वाञ्छामि यत् अहं दिनपत्रिका भवेयम् । तदा सदैव तव अङ्कगता भवेयम् ।

भर्ता: अहमपि वाञ्छामि यत् त्वं दिनपत्रिका भवेः । तदा प्रतिदिनं नूतना भवेः । 

- - - - 

Sanskrit blog: Conversations between a couple-9

पतिपत्नीसंलापः-९

कच्चित् प्रिय स्मरसि हर्षमदप्रणुन्नः

पौत्रोत्सवेऽभ्युपगते भगवत्प्रसादात् ।

उच्चैर्वदन् श्रुणुत पौत्रपितामहोऽस्मी-

त्यास्वाद्यभक्ष्यनिकरान्व्यतरः परेषु ॥ ३८ ॥

कच्चित्प्रिये स्मरसि मामवदः सखेदम्

दौहित्रपौत्रगणजातसुखानुबद्ध- ।

चित्तस्य मे स्वभवनानि गतेषु तेषु

तै रिक्तमालयमहो नरकं हि मन्वे ॥ ३९ ॥

कच्चित्प्रिय स्मरसि सान्त्वनमाददास्त्वं

लब्ध्वा पतत्रयुगलं प्रजहाति मातुः।

नीडं खगः खलु तथापि जहात्यपत्यम्

मातुर्गृहं स्वगृहनिर्मितिमग्नचित्तम् ॥ ४० ॥- - - - 

Sanskrit blog: Humour-103

हास्यसीकरः-१०३

पतिः पत्नीं वदति, “प्रिये! अहं मममित्रमेकम् अद्यरात्रौ भोजनाय आह्वयम्” इति ।
पत्नी वदति, “अरे, किमिदम्? मत्तोऽसि किम्? गृहमव्यवस्थितं वर्तते । वस्त्राणि क्रेतुमापणं जिगमिषामि । अद्य भक्ष्यभोज्ययुतभोजनपाके मम आस्था नास्ति ।“

पतिः, “अहं सर्वं जानामि” ।

पत्नी , “अथ कुतः मित्रम् आह्वयः?”

पतिः, “ मुग्धः सः परिणेतुं वाञ्छति” ।

- - - - 

Sanskrit blog:Conversations between a couple-8

पतिपत्नीसंलापः-८

कच्चित् प्रिय स्मरसि दारपरिग्रहार्थं

पुत्रस्य बन्धुसुहृदाप्तजने विचिन्वन्

पुत्रे त्वदुद्धृतवधूषु न जातमोहे

तत्प्रेमपात्रललनां स्व्यकरोः स्नुषात्वे ॥ ३६ ॥

कच्चित् प्रिये स्मरसि मातृधरां विहाय

पत्न्या सह स्वनवसौख्यसुधावसिक्तः ।

पुत्रो विमानगमनोत्सुकतापरीतः

त्वां मातरं किल न किञ्चिदपि न्यगादीत् ॥ ३७ ॥

- - - -  

Sanskrit blog: Humour-102

हास्यसीकरः-१०२

कार्-याने उद्योगालयं गच्छन् नर एकः स्वोद्योगालयस्य निकटे कार्-यानसंस्थापनाय स्थलम् मार्गयति स्म । कुत्रापि अवकाशः न दृष्टः । स्वकार्याय त्वरितं गन्तुकामः ईश्वरं यावत् प्रार्थयत्, “प्रभो! त्वत्कृपया यदि कार्-संस्थापनाय अवकाशः लभ्यते चेत् अद्य प्रभृति धूमपानं न करिष्यामि” इति तावदेव अवकाशः दृष्टः । झटिति ईश्वरमवदत्, “विस्मर यदुक्तम् प्रभो । इदानीमेव अवकाशः लब्धः” इति ।  
- - - - 

Sanskrit blog: Conversation between a couple-7

पतिपत्नीसंलापः-७

कच्चित्प्रिये स्मरसि नृत्यदभूतकान्तिः

पुत्रोत्सवेऽभ्युपगते सुतमात्ममूर्तिम् ।

अङ्के निवेश्य तव मानसराजहंसम्

बालानवाप्यवचनैस्समभाषथास्त्वम्॥३३ ॥

कच्चित् प्रिय स्मरसि तानि मनोहराणि

वर्षाण्यपत्ययुगलालनशिक्षणेषु

प्रत्यूहकण्टकशतैरवरुद्धमार्गे

तूर्णं क्षणार्धसमये इव यापितानि ॥ ३४ ॥

कच्चित् प्रिये स्मरसि तावकदुःखधाराम्

पुत्र्यां नवोढललनोचितदीप्तिमूर्त्याम् ।

भर्त्रा सह श्वशुरगेहमभि प्रयान्त्याम्

हर्षावगुण्ठनतिरोहितनैजरूपाम् ॥ ३५ ॥

- - - - 

Sanskrit blog: Humour-101

हास्यसीकरः-१०१

वैद्यः चिकित्सां लब्धवता केनचन सह दूरवाण्यां समलपत्, “भोः, त्वया दत्तं वित्तकोषपत्रं(cheque) पुनरायातम् खलु” इति ।

चिकित्सितः प्रत्यवदत्,”क्षम्यतां, मम जानुवेदना च पुनरायाता” इति ।

- - - - 

Sanskrit blog: Conversation between a couple-6

पतिपत्नीसंलापः-६

कच्चित्प्रिये स्मरसि रोषपरीतनेत्राम्

केनापि कारणलवेन मयि प्ररुष्टाम् ।

त्वां निन्दनैर्बहुविधैः खलु मां तुदन्तीम्

पुत्री स्वमुग्धवचनैरकरोत् हसन्तीम् ॥ ३१ ॥

कच्चित्प्रिय स्मरसि नागरपाठशालाम्

यावद्गता तव सुता खलु तावदेव

मां पाककर्मणि रतां प्रसभं बलाढ्यः

शय्यागृहं  ह्यगमयस्त्वमदम्यकामः ॥ ३२ ॥

- - - - 

Sanskrit blog: Humour-100

हास्यसीकरः-१००

काचन कार्-यानचालिका राजपथे आरक्षकेण अवरुद्धा । अवरोधकारणं पृष्टः आरक्षकः प्रत्यवदत्, “आर्ये! अनुज्ञातवेगमतिक्रम्य वाहनं त्वया चालितम् । कृपया दर्शय तव चालनानुज्ञापत्रम् । स्त्री प्रत्यवदत्, “आर्य! मम अनुज्ञापत्रं नास्ति । त्रिवारं मदिरापानमत्ता कार्-यानचालनमकरवमिति कारणात् आरक्षकैः तत् स्वायत्तीकृतम्”। चकितः आरक्षकः अपृच्छत्,”आर्ये! कृपया वाहनस्य पञ्जीसंख्यापत्रं दर्शय” इति । स्त्री प्रत्यवदत्, “तन्नास्ति, अहं इदं कारयानमपाहरम् “।

आरक्षकः,”अपाहरः?”

स्त्री, “बाढम्, न केवलं कार्-यानमपाहरं, तस्य स्वामिनं हत्वा तस्य कायं खण्डशः निकर्त्य कार्-यानस्य सामग्रीकोष्ठे न्यवेशयम्”

आरक्षकः नितरां भ्रान्तः स्वनियामकेन सह दूरवाण्या समलपत् साहाय्यं प्रार्थयच्च । क्षणात् नियामकः कतिभिश्चन आरक्षकैः सह तत्र वाहने आगच्छत् । तां स्त्रियं स्वगुलिकास्त्रस्य लक्ष्यं कृत्वा अवदत्,”कृपया यानादवातर”।स्त्री अवातरत् अपृच्छच्च,”आर्य, किमापतितम्?” नियामकः,” आर्ये! मम आरक्षकः वदति,”त्वं, कार्-यानमपहृत्य तस्य स्वामिनमहन्” इति । दिग्भ्रान्ता इव स्त्री अवदत्, “किं?किं? अहमहनम्? “ इति। नियामकः अवदत्, “कार्-यानस्य सामग्रीकोष्ठम् अपावृणु” इति । स्त्री सामग्री-कोष्ठम् अपावृणोत् । सामग्री कोष्ठे न किञ्चिदपि वस्तु अवर्तत ।

नियामकः, “कच्चिदिदं तव यानम्?”

स्त्री, “आर्य! निःसंशयम्” ।

 “तर्हि तव यानस्य पञ्जीसंख्यापत्रं दर्शय” ।

“पश्य, इदं पत्रम्” इति वदन्ती पञ्जीसंख्यापत्रमदर्शयत्।

“तव चालनानुज्ञापत्रं दर्शय।“

हस्तस्यूतात् अनुज्ञापत्रमुद्धृत्य स्त्री अदर्शयत् ।

नियामकः उद्भ्रान्तः तामवदत्, “आर्ये! क्षमस्व माम् । आरक्षकः मामवादीत् त्वं कारयानमपहृत्य, कार्-यानस्वामिनं हत्वा, तस्य कलेवरं निकर्त्य यानस्य सामग्री-कोष्ठे न्यवेशयः । त्वया साकं न कार्-यानपञ्जीसंख्यापत्रं न च तव चालनानुज्ञापत्रं वर्तेते इति ।“

स्त्री, “अहो! अनृतस्य पराकाष्ठा खलु । स च प्रायेण अवादीत् यदहं अनुज्ञातवेगमतिक्रम्य कार्-यानचालनमकार्षं च?”

- - - -  

Sanskrit blog:Conversation between a couple-5

पतिपत्नीसंलापः-५

कच्चित्प्रिये स्मरसि मां तदनु न्यगादीः

ग्रामात्पुरं जिगमिषुं विभवार्जनाय ।

मा गा हृदीश न भवेयमहं विना त्वाम्

इत्यन्वगाश्च झटिति प्रणयार्दितं माम् ॥ २५ ॥

कच्चित्प्रिय स्मरसि दौहृदलक्षणस्थाम्

विद्यार्जने शिथिलिताध्यनप्रवृत्तिम् ।

संचोदयन् बहुमुखैः प्रविलोभनैर्माम्

भूयो प्रशिक्षणविधावकरोः प्रवृत्ताम् ॥ २६ ॥

कच्चित्प्रिये स्मरसि मां प्रति सूतिगेहे

सूतिव्यथाजनितरूक्षवचांसि तानि ।

संश्रुत्य ते प्रलपितानि नियम्य हासम्

शुश्रूषिका सकरुणं समसान्त्वयत्त्वाम् ॥ २७ ॥

कच्चित्प्रिय स्मरसि मोहकमर्भकं मे

पार्श्वे प्रसुप्तमवलोक्य मुहुर्मुहुस्त्वम् ।

हर्षापगारयनिमज्जनधौतचित्तां

मां प्रेमपूरितदृशा नितरामचूषः ॥॥ २८ ॥

कच्चित्प्रिये स्मरसि ता युगदीर्घरात्रीः

यासु त्वया सह सुतां ज्वरपीडिताङ्गीम् ।

अङ्के निवेश्य हिमशीतलपट्ट्बन्धैः

शीर्षस्य तापशमने बहुशोऽयते‍ऽहम् ॥ २९ ॥

कच्चित्प्रिय स्मरसि सोत्सवसंभ्रमान् तान्

पादौ परिक्षिपति च स्मयतेऽधुनेति ।

अद्यात्मनैव विचलत्युरसेति पुत्री

पद्भ्यां स्वयं चरति संप्रति जल्पतीति ॥ ३० ॥  

- - - -